ಕ್ಷಣಾರ್ಧದಲ್ಲಿ ಹ್ಯಾಕರ್ಸ್​ ಪಾಲಾಗಲಿದೆ ನಿಮ್ಮ ಮಾಹಿತಿ: ಸಿಮ್​ನಲ್ಲಿನ ಸಿಮ್​ಜ್ಯಾಕರ್​ ಪತ್ತೆ, ತೊಂದರೆಯಲ್ಲಿದೆ 700 ಮಿಲಿಯನ್​ ಸಿಮ್​ಕಾರ್ಡ್ಸ್​!

ನವದೆಹಲಿ: ಇಂದಿನ ದಿನಗಳಲ್ಲಿ ನಾವು ಪ್ರತಿಯೊಂದನ್ನು ಆನ್​ಲೈನ್​ನಲ್ಲಿ ಖರೀದಿಸಲು ಇಂಟರ್​ನೆಟ್​ ಸುಲಭ ಮಾಡಿಬಿಟ್ಟಿದೆ. ಆದರೆ, ಇದೇ ಇಂಟರ್​ನೆಟ್​​ನಲ್ಲಿ ಸ್ವಲ್ಪ ಯಾಮಾರಿದರು ಕೆಲವೇ ಸೆಕೆಂಡ್​ಗಳಲ್ಲಿ ದೋಷವುಂಟಾಗಿ ನಮ್ಮ ಕೆಲ ಉಪಯುಕ್ತತೆಯನ್ನು ಕಳೆದುಕೊಳ್ಳಬೇಕಾಗುತ್ತದೆ. ಹೀಗಾಗಿಯೇ ಇಂದು ಸಾಕಷ್ಟು ಸೈಬರ್​ ಕ್ರೈಂ ಪ್ರಕರಣಗಳು ಬೆಳಕಿಗೆ ಬರುತ್ತಿವೆ.

ಇತ್ತೀಚಿನ ಘಟನೆಯೊಂದರಲ್ಲಿ ಅಡ್ಯಾಪ್ಟಿವ್​ ಮೊಬೈಲ್​ ಸೆಕ್ಯುರಿಟಿ ಸಂಸ್ಥೆ ಮೊಬೈಲ್​ ಸಿಮ್​ಗೆ ತೊಂದರೆ ಮಾಡುವ ಸಿಮ್​ಜ್ಯಾಕರ್​(SimJacker) ದೋಷವನ್ನು ಪತ್ತೆ ಹಚ್ಚಿದ್ದಾರೆ. ಇತ್ತೀಚಿನ ದಿನಗಳಲ್ಲಿ ವಿಶ್ವದಲ್ಲಿ ಸೈಬರ್​ ಕ್ರೈಂ ಪ್ರಕರಣಗಳು ಸಾಮಾನ್ಯವಾಗಿವೆ. ಇದರ ಮೇಲೆ ನಿಗಾ ಇಟ್ಟಿರುವ ಸೈಬರ್​ಸೆಕ್ಯುರಿಟಿ ತನಿಖಾಧಿಕಾರಿಗಳು ಇತ್ತೀಚೆಗೆ ಪತ್ತೆ ಮಾಡಲು ಕಷ್ಟಕರವಾರ ದೋಷವನ್ನು ಸಿಮ್​ಕಾರ್ಡ್​ನಲ್ಲಿ ಪತ್ತೆಹಚ್ಚಿದ್ದಾರೆ.

ಈ ದೋಷವು ದೊಡ್ಡ ಪ್ರಮಾಣದಲ್ಲಿ ಮೊಬೈಲ್​ಗೆ ಹಾನಿಯುಂಟುಮಾಡಲಿದ್ದು, ಇದರಿಂದ ಮೊಬೈಲ್​ ಹ್ಯಾಕರ್ಸ್​ಗೆ ಸಾಕಷ್ಟು ಲಾಭವಾಗಲಿದೆ. ಕೇವಲ ಒಂದು ಮಸೇಜ್​ನಿಂದ ಸಾಕಷ್ಟು ಡೇಟಾಗಳು ಹ್ಯಾಕರ್ಸ್​ ಪಾಲಾಗಲಿದೆ. ಅಡ್ಯಾಪ್ಟಿವ್​ ಮೊಬೈಲ್​ ಸೆಕ್ಯುರಿಟಿ ಪತ್ತೆ ಹಚ್ಚಿರುವ ದೋಷವನ್ನು ಸಿಮ್​ಜ್ಯಾಕರ್​ ಎಂದು ಕರೆಯಲಾಗಿದ್ದು, ಇದು ಎಸ್​@ಟಿ ಬ್ರೌಸರ್(ಸಿಮ್​ ಟೂಲ್​ಕಿಟ್​)​ ಎಂಬ ಸಾಫ್ಟ್​ವೇರ್​ನಲ್ಲಿ ನೆಲೆಸಿರುತ್ತದೆ. ಸುಮಾರು 30 ದೇಶಗಳಲ್ಲಿ ಬಳಸುವ ಸಿಮ್​ ಕಾರ್ಡ್​ಗಳಲ್ಲಿ ಈ ಸಾಫ್ಟ್​ವೇರ್​ ಅನ್ನು ಮೊಬೈಲ್​ ಆಪರೇಟರ್ಸ್​ ಬಳಸುತ್ತಿದ್ದು, ಮೊಬೈಲ್​ ಬಳಕೆದಾರನಿಗೆ ಗೊತ್ತಿಲ್ಲದೆ, ಕೆಲವೊಂದನ್ನು ತಮ್ಮ ಲಾಭಕ್ಕೆ ಬಳಸಿಕೊಳ್ಳಬಹುದಾಗಿದೆ.

ಸುಮಾರು ಎರಡು ವರ್ಷಗಳಿಂದ ಸರ್ಕಾರದ ಜತೆ ಕಾರ್ಯನಿರ್ವಹಿಸುವ ಖಾಸಗಿ ಕಂಪನಿಯೊಂದು ಈ ಸಾಫ್ಟ್​​ವೇರ್​ ಅನ್ನು ಬಳಸಿಕೊಳ್ಳುತ್ತಿದ್ದು, ಇವರು ಹಲವು ದೇಶದ ಮೊಬೈಲ್​ ಬಳಕೆದಾರರನ್ನು ಹಲವು ದಿನಗಳಿಂದ ಗಮನಿಸುತ್ತಿದ್ದಾರೆ ಎಂಬ ಆತಂಕಕಾರಿ ವರದಿ ಬೆಳಕಿಗೆ ಬಂದಿದೆ.

ಈ ಸಾಫ್ಟ್​ವೇರ್​ನಿಂದ ಏನು ಮಾಡುತ್ತಾರೆ?
ಎಸ್​@ಟಿ ಬ್ರೌಸರ್ ಅನ್ನು ಸಿಮ್​ಅಲೈಯನ್ಸ್​ ಟೂಲ್​ಬಾಕ್ಸ್​ ಬ್ರೌಸರ್​ ಎಂದು ಕರೆಯಲಾಗುತ್ತದೆ. ಇದೊಂದು ಅಪ್ಲಿಕೇಶನ್​ ಆಗಿದ್ದು, ಇದು ಸಿಮ್​ ಟೂಲ್​ ಕಿಟ್​(ಎಸ್​ಟಿಕೆ)ನಲ್ಲಿ ಇರುತ್ತದೆ. ಇದನ್ನು ಹಲವು ಸಿಮ್​ಗಳು ಮತ್ತು ಇಸಿಮ್​ಗಳಲ್ಲಿ ಇನ್​ಸ್ಟಾಲ್​ ಮಾಡಲಾಗಿರುತ್ತದೆ. ಇದನ್ನು ಪ್ರಾಥಮಿಕವಾಗಿ ಕೆಲ ಮೂಲ ಸೇವೆಗಳನ್ನು ಒದಗಿಸಲು ವಿನ್ಯಾಸಗೊಳಿಸಲಾಗಿರುತ್ತದೆ.

ಎಸ್​@ಟಿ ಬ್ರೌಸರ್ ವಿವಿಧ ಎಸ್​ಕೆಟಿ ಸೂಚನೆಗಳನ್ನು ನಿರ್ವಹಿಸುತ್ತಿರುವತ್ತದೆ. ಶಾರ್ಟ್​ ಮೆಸೇಜ್​ ಕಳುಹಿಸುವುದು, ಕಾಲ್​ ಸೆಟಪ್​, ಲಾಂಚ್​ ಬ್ರೌಸರ್​, ಸ್ಥಳೀಯ ಡೇಟಾ ಒದಗಿಸುವುದು, ರನ್​ ಅಟ್​ ಕಮ್ಯಾಂಡ್​ ಮತ್ತು ಡೇಟಾ ಕಳುಹಿಸುವ ಕೆಲಸ ಮಾಡುತ್ತದೆ. ಈ ಸೂಚನೆಯು ಮೊಬೈಲ್​ ಸಾಧನಗಳಿಗೆ ಎಸ್​ಎಂಎಸ್​ ಕಳುಹಿಸುವ ಮೂಲಕ ಬಳಕೆದಾರನನ್ನು ಪ್ರಚೋದಿಸುತ್ತದೆ.

ಈ ಸಾಫ್ಟ್​ವೇರ್​ ಮೊಬೈಲ್​ ಅನ್ನು ಟಾರ್ಗೆಟ್​ ಮಾಡಿ, ಲೊಕೇಶನ್​ ಮತ್ತು ಐಎಂಇಐ ಮಾಹಿತಿಯನ್ನು ಒದಗಿಸುತ್ತದೆ. ಬಳಕೆದಾರನ ಪರವಾಗಿ ಸುಳ್ಳು ಸಂದೇಶಗಳನ್ನು ಕಳುಹಿಸುವ ಮೂಲಕ ತಪ್ಪು ಮಾಹಿತಿಯನ್ನು ಹರಡುತ್ತದೆ. ದುರುದ್ದೇಶಪೂರಿತ ವೆಬ್ ಪುಟವನ್ನು ತೆರೆಯಲು ಬಳಕೆದಾರನನ್ನು ಬ್ರೌಸರ್ ಮೂಲಕ ಒತ್ತಾಯಿಸಿ ಮಾಲ್ವೇರ್ ಅನ್ನು ಹರಡುತ್ತದೆ. ಬಳಕೆದಾರನ ವಿರುದ್ಧವೇ ಗೂಢಾಚಾರಿಕೆ ಮಾಡುವುದು ಮುಂತಾದ ತೊಂದರೆಗಳು ಈ ಸಾಫ್ಟ್​ವೇರ್​ನಲ್ಲಿದೆ.

ಮೋಟೊರೋಲಾ, ಸ್ಯಾಮ್​ಸಂಗ್​, ಗೂಗಲ್​, ಹುವೆಯಿ ಮತ್ತು ಆ್ಯಪಲ್ ಮೊಬೈಲ್​ಗಳಲ್ಲಿ ಈ ಸಾಫ್ಟ್​ವೇರ್​ ಕಂಡುಬಂದಿದೆ.​ ಇದರಿಂದ ಸುಮಾರು 1 ಬಿಲಯನ್​ ಮಂದಿ ಸದ್ಯ ತೊಂದರೆಯಲ್ಲಿದ್ದಾರೆ ಎಂದು ಸಂಶೋಧಕರು ಹೇಳುತ್ತಿದ್ದಾರೆ. ದೋಷವನ್ನು ಒಪ್ಪಿಕೊಂಡಿರುವ ಸಿಮ್​ಅಲೈಯನ್ಸ್​ ಎಸ್​@ಟಿ ಪುಶ್​ ಮಸೇಜ್​ಗಳಿಗೆ ಸೆಕ್ಯುರಿಟಿ ಅನುಷ್ಠಾನಕ್ಕೆ ಸಿಮ್​ ತಯಾರಿಸುವವರಿಗೆ ಶಿಫಾರಸು ಮಾಡಲಾಗುವುದು ಎಂದು ಹೇಳಿದೆ.