ಕಿಚ್ಚ ಸುದೀಪ್​ ಅಭಿನಯದ ಪೈಲ್ವಾನ್​ ಸಿನಿಮಾ ಪೈರಸಿ ಮಾಡಿದ್ದ ಆರೋಪಿಯ ಬಂಧನ

ಬೆಂಗಳೂರು: ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್​ ಅಭಿನಯದ ಬಹುನೀರಿಕ್ಷಿತ “ಪೈಲ್ವಾನ್”​ ಚಿತ್ರವನ್ನು ಪೈರಸಿ ಮಾಡಿದ ಆರೋಪದಲ್ಲಿ ಯುವಕನೊಬ್ಬನನ್ನು ಶುಕ್ರವಾರ ಬಂಧಿಸಲಾಗಿದೆ.

ರಾಕೇಶ್ ಬಂಧಿತ ಆರೋಪಿ. ಸಿಸಿಬಿ ಪೊಲೀಸರಿಂದ ಬಂಧನಗೊಂಡಿರುವ ರಾಕೇಶ್ ನೆಲಮಂಗಲದ ಇಮಚೇನಹಳ್ಳಿ ನಿವಾಸಿ. ಪೈಲ್ವಾನ್ ಚಿತ್ರ ಬಿಡುಗಡೆಯಾದ ದಿನವೇ ಸಂಪೂರ್ಣ ಸಿನಿಮಾ ವೀಕ್ಷಿಸಬಹುದಾದ ಲಿಂಕ್ ಅನ್ನು ತನ್ನ ಫೇಸ್​ಬುಕ್​ ಖಾತೆಯಲ್ಲಿ ಶೇರ್ ಮಾಡಿ ವೈರಲ್​ ಮಾಡಿದ ಆರೋಪ ಕೇಳಿಬಂದಿದೆ.

ಲಿಂಕ್​ ಶೇರ್​ ಮಾಡಿದ್ದಲ್ಲದೆ ತನ್ನ ಫೇಸ್​ಬುಕ್ ಸ್ಟೋರಿಯಲ್ಲಿ ಪೈಲ್ವಾನ್ ಸಿನಿಮಾದ ಲಿಂಕ್ ಬೇಕಾದವರು ತನಗೆ ಇನ್​ಬಾಕ್ಸ್ ಮಾಡುವಂತೆ ಪೋಸ್ಟ್ ಮಾಡಿದ್ದ. ಈತನ ಮೂಲಕ ಆತನ ಇಬ್ಬರು ಫೇಸ್​ಬುಕ್ ಸ್ನೇಹಿತರು ಪೈಲ್ವಾನ್ ಚಿತ್ರದ ಲಿಂಕ್ ಶೇರ್ ಮಾಡಿರುವ ಶಂಕೆ ವ್ಯಕ್ತವಾಗಿದ್ದು, ಸಿಸಿಬಿ ಪೊಲೀಸರಿಂದ ತನಿಖೆ ಮುಂದುವರಿದಿದೆ.

ಇತ್ತೀಚೆಗಷ್ಟೇ ಪೈಲ್ವಾನ್ ಚಿತ್ರದ ನಿರ್ಮಾಪಕಿ‌ ಸ್ವಪ್ನ ಕೃಷ್ಣ ಪೊಲೀಸರಿಗೆ ದೂರು ನೀಡಿದ್ದರು. ಈ ಬಗ್ಗೆ ಸೈಬರ್ ಕ್ರೈಂ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು.

ಬಂಧಿತ ಆರೋಪಿ ದರ್ಶನ್​ ಅಭಿಮಾನಿ
ಆರೋಪಿ ರಾಕೇಶ್​ ದರ್ಶನ್​ ಅಭಿಮಾನಿಯಾಗಿದ್ದು, ತನ್ನ ಫೇಸ್​ಬುಕ್​ ಖಾತೆಯಲ್ಲಿ ಸಾಕಷ್ಟು ದರ್ಶನ್​ ಫೋಟೊಗಳನ್ನು ಪೋಸ್ಟ್​ ಮಾಡಿಕೊಂಡಿದ್ದಾನೆ. ಅಲ್ಲದೆ, ತನ್ನ ಪ್ರೊಫೈಲ್​ನಲ್ಲಿ ದರ್ಶನ್​ ಅಭಿಮಾನಿಯಂತಲೂ ಬರೆದುಕೊಂಡಿದ್ದಾನೆ.

......................